VALERIO HAKDASAK DE’IT TANBA LAIHA KADERA RODA

 
Valerio Soares ho kondisaun Defisiensia Fisiku

Dili- 23/08/2023-Media Defisiensia, Valerio Soares, hakdasak de’it iha fatin durante tinan naruk ona laiha kadeira roda hodi ajuda Valerio ba mai, buat hotu nia atu hala’o depende ba familia nia ajuda.

Valerio Soares moris iha loron 16 fulan Abril tinan 1992 no nia kompleta ona tinan tolu nulu resin ida (31), ho kondisaun ne’ebe nia hasoru halo nia labele moris mesak presiza hamutuk ho familia sira durante tinan naruk nia laran husi Aldeia Sasahi, Suco Fatu-Maquerec, Posto Administrativo Soibada Munisipiu Manatuto, Valerio ho kondisaun Defisiensia Fisiku.

 Haktuir Istória Valerio husi Inan Paulina Soares hatete, Valerio hetan kondisaun Defisiensia Fiziku tanba kauza husi moras ulun no ain hahu kedas husi nia sei halo tinan hitu (7) grave  to’o ohin loron.

Durante ne’e nia hetan ona ajuda husi parte Governu, no sasan ne’ebe nia hetan mak kadera roda, no kadera roda ne’ebe nia uza oras ne’e aat kleur tiha ona, tanba ne’e nia husu ba Governu no Organizasaun Defisiensia sira atu ajuda hikas fali kadera roda ba nia oan atu halo movimentu ba mai.

Haktuir Istória Valerio husi Inan Paulina Soares

“Ha’u nia oan Valerio moris sei bebe isin lolon ho kondisaun laho Defisiensia, wainhira kompleta tinan hitu (7) sofre moras iha ulun no ain, husi momentu sira ne’e ha’u oan nia ulun sai bot nune’e labele bok-an ho di’ak tanba sofre mos iha ain.

Valerio nia atividade moris loron-loron tu’ur no hakdasak de’it iha rai, husi moras ulun ne’ebé iha halo ona tratamentu iha ospital maibe labele hetan kondisaun diak, ho nune’e ami familia lori fali oan mai uma hodi konsumu aimoruk tradisional, ho Grasa Na’i Maromak nian ha’u mehi hetan ema ida hatudu Aimoruk tradisional, ikus mai ha’u uza duni aimoruk ne’e fo ba ha’u nia oan kosumu no ha’u nia oan nia ulun komesa tun fila fali, maibé ain labele rekopera to’o ohin loron.

Durante ne’e ha’u nia oan hetan ona kadera roda husi parte Governu, maibe kadera roda ne’ebe ha’u nia oan uza aat kleur tiha ona, tanba ne’e ha’u hakarak rekomenda ba Governu no Organizasaun Defisiensia sira atu mai hare direita ha’u nia oan nia kondisaun moris ne’ebe nia hasoru to’o ohin loron, atu nune’e ita boot sira bele ajuda Netik kadera roda ba ha’u nia oan hodi halo movimentu ba mai hanesan nia kolega defisiensia sira seluk, hodi labele depende ba familia nia ajuda, tanba familia nia ajuda dalaruma sei latuir ha’u nia oan nia hakarak,” Tenik nia Inan.

Jornalista: Ermenciana Alves

Editor: Alexandre Salsinha