SEFOPE LOKE ABERTURA TESTE DAHULUK BA APLIKANTE AUSTRALIA HAMUTUK 210

Sekretariu Estadu SEFOPE Rogeiro Araujo Mendonça

Dili-21/08/2023, Media Defisiensia -Sekretariadu Estadu Formasaun Profisionál e Empregu (SEFOPE) hala’o teste dahuluk ba aplikante Australia hamutuk nain 210 ne’ebé liu ona iha vaga online foin lalais ne’e.

Tuir Sekretariu Estadu SEFOPE Rogeiro Araujo Mendonça iha nia intervista hatete, objetivu ba serimonia ne’e atu hala’o teste dahuluk ba aplikante hmutuk 210.

“Objetivu ba serimoniu ohin loron liu-liu halo screening ne’ebé mak foin dadauk públik hare dehan 55 mil iha sistema tanba sira mos seidauk prosesa entaun ida ne’e mak ohin realiza ba faze primeiru ho 2.500 ne’ebé mak ita hala’o teste lian inglés primeiru faze husi 55 mil iha sistema,” dehan Sekretariu Estadu SEFOPE Rogeiro Araujo Mendonça iha Suco Comoro postu administrativu Dom Aleixo Munisipiu Dili.

Nia salienta, SEFOPE Instituisaun ida ne’ebé servisu Independente la hare ba kor ou rasa, maibé hare ba sira nia kapasidade ne’ebé mak iha.

“SEFOPE servisu ho parseria sira ne’e servisu independente la hare ba fila fali ba kor ida ne’e kor ida ne’ebá la hare fali nia husi munisipiu ida ne’e munisipiu ida ne’ebá maibé servi ba Timor oan hotu, entaun kuandu atu liu la liu ne’e husi ida intervista ne’e mak bele hanesan ohin hato’o ona ba sira, se mak sira liu signifika katak sira nia kapasidade naton ba sira hodi responde ba iha merkadu, se mak se kuandu sira la liu otomatikamente sira mos sei prepara tuir fila fali treinamentu ou formasaun iha kada munisipiu hodi hetan oportunidade ikus mai,”hakotu nia.

Fatin hanesan reprezentante aplikante Abel Zimoe da Costa de Carvalho Fernandes husi Munisipiu Lautem hatete, liu husi teste refere iha esperansa bot atu bele hadia di’ak, no karik la pasa nia sei prepara an fali hodi hadi’ak liu tan nia inglés hafoin bele prepara iha futuru oin mai.

Reprezentante aplikante Abel Zimoe da Costa de Carvalho Fernandes & Adelaide de Sa Benevides

Nune’e mos Adelaide de Sa Benevides hatete, teste ne’e hanesan prosesu ida tanba ne’e tenke hakat kontribui liu husi an rasik hodi bele atinje objetivu. Maske lian inglés la’os Timor nian maibé koko atu aplika tuir kapasidade ne’e iha, no karik liu nafatin kontinua, se laliu sei pronto simu realidade no koko atu aplika fali iha oportunidade sira tuir mai.

Enkuantu total aplikante ne’ebé partisipa iha teste dahuluk ne’e hamutuk 2.500 kompostu husi feto 71 no mane 139.

Jornalista : Alexandre Salsinha & Pascoal N. de Jesus

Editor : Alexandre Salsinha