PERFIL HUSI ASOSIASAUN DEFISIENSIA FIAR TIMOR-LESTE (ADF-TL)

 
Diretor Asosiasaun Defisiensia Fiar Timor-Leste José Frederico

Dili -15/08/2023 – Media Defisiensia, Tuir diretor Asosiasaun Defisiensia Fiar Timor-Leste José Frederico hatete, ADFTL nu’udar organizasaun ida nebe eziste iha Timor-Leste, iha Munisipio Baucau no komesa hari iha loron 01 fulan Fevereiru tinan 2021. Ho Objectivu oinsa atu hari asosiasaun ida ne’e hodi halibur maluk defisiensia sira hotu iha regiaun leste, no mos atu promove ema ho defisiensia sira nia talentu. Maske ema ho defisiensia maibe sira mos iha direito ne’ebe hanesan ho maluk sira ne’ebe laho defisiensia, tanba ita hotu moris iha lei nia okos no ema hotu-hotu iha direitu, dever no obrigasaun ne’ebe hanesan ho sidadaun sira seluk ho nune’e direitu ne’e universal, tuir artigu 16 no artigu 21.

Bazeia ba politika governu nian ne’e mak iha loron 01 Fevereiru 2021, ami ne’ebe hala’o servisu voluntariu iha ADFTL hamutuk na’in  sanulu resin lima (15) na’in hitu (7) ema ho defisiénsia no  ualu (8) ema laho defisiensia ne’ebé iha koñesimentu intelektuál konsege halibur malu hodi hahú hala’o servisu voluntariu kona-ba formasaun profesional ba ema ho defisiénsia liu-liu ba labarik no labarik ho ema defisiénsia ne’ebé mak durante ne’e sai marjinalizadu iha sosiedade, komunidade parte Munisipiu Baucau, Lautem, Viqueque no Manatuto.

Visaun mak Hari’i Sosiedade ne’ebé matenek, moris di’ak, responsavel, igualdade, ekidade no sustentavel.

Misaun mak hanesan:

1. Servisu hamutuk ho estadu hodi dezenvolve rekursu humanu no formasaun profesional ba ema ho defisiénsia no mós ba ema vunerabel sira.
2. Servisu hamutuk ho parseiru Dezenvolvimentu iha nivel lokal, Regional, Nasionál no Internasionál hodi garante direitu no dever ema ho defisiénsia sira nian.

Objetivu iha rua mak hanesan tuir mai ne’e:

1.     Atu tane a’as liu demokrasia ne’ebé garante Partisipasaun, igualdade, Justisa ho tolerénsia ba ema hotu husi aspeitu oin-oin iha Timor Leste.

2.     Atu partisipa no sai parseria kritiku ba dezemvolvimentu Nasionál, Rejionál no Lokal liu husi formasaun, monitorizasaun no advokasia nu’udar meus ida atu hakbi’it sosiedade Timor-Leste, liu-liu ba ema ho defisiénsia no vuneravel sira.

Programa sira husi Asosiasaun Defisiensia Fiar Timor-Leste hamutuk ualu (8) mak hanesan:

1.     Edukasaun

2.     Advokasia no Inkluzaun

3.     Promosaun saude no referal

4.     Haforsa feto no feto ho defisiensia

5.     Musika arte no kultura

6.     Hanorin grupu moris rasik/Agrikultura

7.     Labarik no labarik defisiensia fokus ba sira nia aktividade 

8.     Dezain no kria asesibilidade ba ema ho Defisiensia

Bazeia ba programa hirak ne’e ADF-TL foi hetan suporta no halo parseria ho CRS ho CDB liu hosi Atividade Agrofloresta ne’e hala’o iha Munisipio Baucau no mós Vikeke mesmu tempo mos fo oportunidade hodi halo advokasia ba partisipante sira ne’ebe patisipa iha atividade refere. no ADFTL mos hetan suporta husi Parseiru Australia Monash Friend ne’ebe maka oferese kadeira, meja, leptop, Ipad hodi kompleta fasilidade ba Kursu ba labarik no Jovens sira no fasilidade ema ho defisiensia sira nian hanesan kadeira roda, aitonka no mos fasilidade seluk.

Diretor Asosiasaun Defisiensia Fiar Timor-Leste hato’o mensajem ba maluk defisiensia sira hotu katak aproveita oportunidade sira iha organizasaun ka asosiasaun hotu atu nune’e bele aumenta kapasidade no koñesimentu. Ba parte Governu maka tau importansia mos ba Ema ho Defisiensia no promove mos sira nia kapasidade no abilidade ba parte hotu-hotu iha instituisaun Governu nian.

Jornalista: Ermenciana Alves

Editor: Alexandre Salsinha