EMILIA PIRES TENKI FILA MAI TL

Diretur Ezekutivu FONGTIL Valentim da Costa Pinto

Dili-04/08/2023, Media Defisiensia, Forun ONG Timor-Leste orgullu no husu Emilia Pires tenki fila mai Timor hodi bele investe nia matenek atu dezenvolve nia rain rasik.

Tuir Diretur Ezekutivu FONGTIL Valentim da Costa Pinto hatete, orgullu ho matenek ne’ebé iha hodi bele kontribui reseitas husi petroliferu ne’ebé aumenta, maibé tenki hatene mos kazu ne’ebé nia iha,

Nia husu mos ba Governu atu kompleta lalais estatutu legal sira, no bainhira tribunal la fo sai indikasaun ruma maka nia bele halo nia kontribuisaun hanesan Timor oan.

“orgullu bot ida ba Timor oan ne’ebé  matenek bele kontribui ba iha reseitas husi petroliferu ne’e bele sa’e, maibé ita mos tenki hatene senhora Emilia mos iha kazu ida ne’ebé  kontinua partidu bot sira publiku kontinua kestiona kona ba ninia estatutu, kona ba kazu ne’ebé nia halo bainhira nia ses husi Timor ba hela iha diaspora iha Portugal hanesan  kazu ne’e ladun la’o ho di’ak, ba ita iha Timor senti kazu ne’e hanesan tratamentu espesifiku uituan.

Hanesan Timor oan ita orgullu se ida ne’e hanesan rekursu no matenek di’ak ida ami hanoin katak ami rekomenda governu atu bele kompleta lalais ninia estatutu legal ne’e hotu, se nia la iha indikasaun ruma tribunal fo sai nia bele halo nia kontribuisaun hanesan Timor oan tanba Timor oan hotu tenki investe duni ho ninia matenek hotu para Timor ne’e sai di’ak, inklui mos senhora Emilia”dehan Diretur Ezekutivu ba Jornalista sira iha salaun FONGTIL Cai-coli.

Nia hatutan, konsidera Emilia Pires iha kapasidade hodi bele kontribui funsionamentu asuntu espesifiku liu-liu iha area petroliferu.

“Nia tenki mai tanba ita konsidera se nia iha kapasidade ne’ebé di’ak bele kontribui ba funsionamentu asuntu espesifiku liu-liu ba petroliferu, hau hanoin nia bele mai Timor para bele kontinua halo kontribuisaun ba ninia matenek ninia kapasidade ne’ebé iha, maibé mos tenki husu kona ba ninia iha justifikasaun kona ba nia kazu legal ne’ebé lao hela iha tribunal para nia bele kontinua ho livre,  no nia bele halo kontribuisaun di’ak ba ita nia nasaun.

Ita tenki obdese ba saida de’it mak tribunal deside, hanesan sidadaun tenki obdese tenki tuir duni saida mak ita nia tribunal deside i tribunal deside se nia la komete buat ruma tenki simu ida ne’e, se nia komete buat ruma tenki simu pena ne’ebé tribunal fo tanba sidadaun hotu la iha lei nia leten hotu-hotu iha lei nia okos”hakotu nia.

entretantu lia ne’e hato hafoin remata enkontru media brifin ho jornalista sira iha salaun FONGTIL Cai-coli kona ba mudansa klimatika iha TL.

Jornalista : Eufrosina Soares Bras

Editor : Alexsandre Salsinha