SOSIALIZASAUN HUSI ASESSOR PRINSIPAL PR BA AEALTL

Dili-17/07/2023 Media Defisiensia, Asessor Presidente Repúblika Gaspar Afonso halo Sosializasaun ba ema afeta lepra iha Municipio Dili.

Ba jornalista sira iha Caicoli Segunda Feira horseik Asessor Gaspar Afonso hateten, servisu ne’ebé nia hala’o iha palasiu Presidente ba   unidade inkluzaun social ne’ebé representa ba ema ho defisiensia ho tipu oi-oin, tanba ne’e   fundus ki’ik ne’ebe mak iha nune’e fo apoiu ba ema sira ne’ebe daudaun ne’e afeta hela   lepra no halo hela tratamentu iha uma nomós sentru saude Tibar.

“Husi apoiu ne’ebé iha la’os deit aihan, maibé oinsá governu bele halo politika ba jestaun sira hanesan aimoruk ba pasiente sira no halo atendimentu husi sentru saude ba ema ho defisiensia ka afeta ba moras lepra nian”. Dehan Assessor Gaspar Afonso

 Asessor ne’e hatutan, husi sosializasaun ida ne’e hodi bele kopera hamutuk ho Asosiasaun ema Afeta Lepra Timor-Leste (AEALTL), atu bele hasa’e sosializasaun, konsiensia, ba entidade hotu, liu liu familia, atu la bele subar sira nia oan ka familia ne’ebé hetan moras refere atu bele halo tratamentu.  Objetivu principal mak oinsa ita nia governo iha politika ba sistema atendimentu adekuadu ba ema ho defisiensia, karik ida ne’e mak ita nia luta no ita nia objetivu prinsipal sira.

Iha fatin hanesan Diretór Exekutivu Joel da Costa dos Santos hateten Atividade ida ohin hanesan atividade abertura ba progama distrubui Futsuplement ba pasiente lepra sira iha Dili ne’ebé mak hetan apoiu husi Gabineti Presidente da Republika ninian ba ema ho Afeta Lepra iha Municipio Dili.

 “Asossisaun Ema Afeta Lepra Timor-Leste foin hari’i  iha  fulan sia (9) nia laran.  Maibe konsege ona halo tratamentu no rekopera ema nain tolu husi moras refere, no agora daudaun halo hela tratamentu ba pasiente foun sira ne’ebe mak ita identifika rasik,” dehan Diretór AEALTL.

Asossiasaun Ema Afeta Moras lepra timor-Leste, Rekomenda ba Governu no  organizsaun sosiadade Sivil sira  ne’ebe mak  servisu no tau matan ba asuntu lepra tanba ne’e agora dadaun  moras refere  sae ho pursentu aas no kauza sai defisiensia, ho nune’e husu ba  Ministeriu saúde liu-liu ba sistema atendementu  aimoruk sira atu bele halo tratamentu ba moras lepra atu nun’e labele kauza sai defisiensia iha tempu tuir mai.

João Alegria Madeira hanesan pasiente ne’ebe afeta moras lepra, sente kontente bainhira  hetan suporta husi asessor  Presidente da Republika, liu hosi nesessidade basika balun, no nia apresia mós ho assessor nia sosializasaun ba ema afeta lepra iha Timor Leste ne’ebe maka  sei fo kontribuisaun ba  atendimentu ema afeta lepra iha futuru.

Nia hatutan Moras lepra fofoun mosu hanesan hena mutin, la sente moras, maibé katar no koi to ran sai mos la sente moras ida, maibe ho grasa Maromak nian agora  halo tratamentu diak ona, no durante ne’e hau konsumu aimoruk to tinan ida mak foin diak.

Jornalista: Geraldino Perreira Magno & Saturnina P. Gomes

Editor     : Alexandre Salsinha