Dili: 15/07/2023-Media
Defisiensia-Rozelia Magalhães moris iha loron 04 fulan juñu tinan 1998 husi
Munisipiu Ermera, Posto Administrativo Hatulia A, suku Coilate, Aldeia Hau-Hei,
oan husi Aman Fransisco Soares no Inan Rosa Magalhães. Nia iha maun bin hamutuk
na’in (6), feto (5) no mane nain (1), nia mak oan ikus husi sira nain neen no
husi familia Rozelia mak ema nebe hetan kondisaun defisiensia fiziku.
Rozelia hateten maske ho kondisaun
defisiensia maibé nia senti nafatin kontente tanba ita hotu hanesan de’it iha
Maromak futar oin.
Haktuir Rozelia moris husi kiik kedas
hetan ona kondisaun defisiensia fiziku, tuir kondisaun ne’ebé nia infrenta,
hanoin katak satan ona ba moris no laiha ona oportunidade atu asesu ba saida
de’it, tanba deskriminasaun mosu barak liu iha komunidade nia leet ho kondisaun
defisiensia nebe mak Rozelia iha.
Iha momentu ne’eba
tinan aumenta ba nafatin maibe seidauk asesu ba eskola, wain hira hau ho mae ba
iha merkadu Lete Foho, hetan Malae Australia ida hare hau nia kondisaun no
hakarak ajuda hau, hodi fo motivasaun no enkoraja hau atu ba eskola no labele
hare ba kondisaun ne’ebe mak ha’u iha hodi hamate ha'u nia estudu.
Hau kontete wain
hira ha’u rona motivasaun hirak ne’e, no hau nia mae ho pai mos kontente hodi
haruka hau ba eskola iha primaria E.B.F. Raeraga, kontinua Pre-Sekundaria iha
E.B.C. Ducurai. Iha tinan 2016 hau para tiha eskola iha pre-sekundaria tanba
hau hela dok husi eskola no forsa la too atu la’o loro-loron tanba ho kondisaun
nebe mak ha’u hasoru halo ha'u labele la’o ho distansia ne’ebe dook.
Grasa Maromak nian
hodi fo ksolok ba Mana Virgina Maia ne’ebe hasoru direita hau iha Gleno hodi
hateten ba hau alin hakarak hau lori alin ba hela iha Fundasaun Ahisaun, tanba
fatin ne’e halibur ema ho defisiensia sira. Iha momentu ne’e kedas familia sira
lori kedas hau mai iha Kolejiu Fundasaun Ahisaun iha loron 13 fulan Maio tinan
2016. Iha momentu ne’e hau sente kontente tebes tanba hau hamutuk fali ho hau
nia kolega Defisiensia sira iha Kolejiu Fundasaun Ahisaun.
Agradese wa’in ba
Fundasaun Ahisaun ne’ebe hala’o kopersaun hamutuk ho Fundasaun Cristal hodi
suporta ha’u nia estudu Iha tinan 2017 hau kontinua pre-sekundaria iha Cristal, no remata
iha tinan 2018, nune’e kontinua nafatin sekundaria iha fatin refere too remata
iha tinan 2021. hau hakat ona ba Institutu Superior Cristal no agora ha’u
semester III, hau agaradese tebes tanba maske ho kondisaun ne’ebé la fo espasu
ba hau maibe ho suporta no motivasaun sira ohin loron hau bele too iha fase ida
ne’e katak hau mos bele hanesan ho maluk sira seluk.
Intervista: Efifania dos Santos
Editor: Alexandre Salsinha
0 Comments