LALA’OK MORIS MARGARIDA AMARAL

Margarida Amaral ho kondisaun Defisiensia Mental

Margarida Amaral ho idade 25 moris iha loron 27 fulan Agosto Tinan 1997 husi Municipio Manatutu, Posto Administrativo Soibada Suku Samoro Aldeia Uma-Kerek Leten, Bairo Bubur-Fahi oan husi Aman Luis Lakuraen Sarmento no Inan Romana Sarmento iha familia uma laran sira hamutuk nain 7 no Margarida oan ba dala 4 husi Familia. Margarida Amaral moris ho kondisaun Defisiensia Mental.

Haktuir historia husi aman Luis Lakuraen Sarmentu katak, Margarida moris mai la ho defisiensia Mental, bainhira Margarida ho idade 20 nia sofre moras derepente monu ba rai halo kaben mutin sai, halo familia sira sai tauk ho Margarida nia moras refere.

Iha momentu ne’e kedas Familia lori Margarida ba hospital hodi halo tratamentu iha Posto Administrativu Soibada, maibe doutor labele rekopera lalais Margarida nia moras ho nune’e familia tenke hodi Margarida fila ba uma hodi fo tratamentu liu husi aimoruk tradisional. Moras ne’ebe Margarida hasoru seidauk di’ak Margarida hasoru tan moras ain kanek iha akontesimentu husi ai suak wainhira nia halo servisu kuda rai, ho nune’e familia tenke hodi tan Margarida mai tratamentu iha hospital Dilli durante fulan ida.

Moras ne’ebe Margarida hasoru nunka mais para no hadook husi nia, maibe kada loron kada fulan no tinan sempre akontese ba nia hodi halo Aman no Inan sempre triste ho moras ne’ebe oan Margarida hasoru. Hanesan feto klosan ho idade ne’ebe sei joven ho kondisaun la fo espasu ba nia atu ajuda inan Aman maibe inan aman la lakon esperasa hodi hare no tau matan ba nia husi kiik too ohin loron kompleta idade 25.

Aman husi Margarida hatutan durante Margarida sofre moras refere too ohin loron, Margarida seidauk hetan tulun husi parte ruma, sira sempre hatama dokumentu atu nune’e hetan apoiu ka subsidiu defisiensia nian maibe ate agora laiha parte ida maka hatan ba preokupasaun Margarida nian.

Husi Aman Margarida husu ba parte sira ne’ebe hare no tau matan ba ema ho defisiensia atu hare lalais ba asuntu sira nee atu nune’e Margarida mos bele sente no hola parte hodi hetan subsidiu nebe apoiu husi Governu ba Ema ho Defisiensia sira.

Jornalista: Ermenciana Alves

Editor: Alexandre Salsinha