SEI ABERUTA ATIVIDADE DISKUSAUN VBJ HAMUTUK HO PARSEIRU NASIONAL NO INTERNASIONAL

 

Dili-29/10/2024-Média Defisiensia, Sekretariu Estadu ba Igualdade (SEI), hamutuk ho parseiru nasional no internasional sira, realiza diskusaun kona-ba integrasaun estratéjia prevensaun Violensia Bazeia ba Jeneru iha Timor-Leste.

 Tuir SEI Elvina dé Sousa Carvalho, hatete abertura ba diskusaun ohin atu koali kona-ba Violensia Bazeia ba Jeneru iha kuadru nasionál sira, haforsa servisu saúde no justisa nian, no hatudu kontribuisaun esensiál sira husi OSS sira iha advokasia ba mudansa. Inisiativa kolaborativu ida-ne'e ko'alia liu kona-ba responsabilidade sira ne'ebé fahe ba malu hodi kombate VBJ no asegura katak lian sobrevivente sira-nian sai prioridade.

 "Esforsu hamutuk liuhusi T4E importante tebes atu hatan ba violénsia bazeia ba jéneru iha Timor-Leste. Programa ne’e transforma norma sosiál sira, hasa'e asesu ba servisu esensial sira, no promove kolaborasaun entre parte interesada hotu-hotu, hodi kontribui ba sosiedade ida-ne'ebé seguru no inkluzivu liutan atu bele hamutuk, Dehan Sekretaria Estadu ba Igualdade iha Salaun City 8, 28/10.   

 SEI esplika, durante implementasaun, projetu T4E direitamente benefisia ona ema na'in 60,660 resin, inklui feto, mane, ema ho defisiénsia no membru komunidade LGBTI sira, liuhusi transforma atitude, hasa'e asesu ba servisu esensiál sira, no hadi'a lejislasaun kontra diskriminasaun ba jéneru, no halo ona diferensa barak. Projetu ne'e kolabora ona ho instituisaun governu 25, OSS 19 no instituisaun públiku 5 hodi hasa'e kapasidade iha setór oin-oin no hadi'a asesu ba servisu esensiál sira ba sobrevivente VBJ sira.

 Iha fatin hanesan Ofisial Enkaregadu Koordenador Rezidente Nasoins Unidas Arvind Mathur, akresenta sira rekoñese komprimisiu governu TL no parte relevamnte sira rekoñese asuntu VBJ ne’e importante atu asegura no prevene asaun ne’e iha futuru.

 "Ami rekoñese tebes kompromisu ne'ebé maka Governu Timor-Leste no parseiru sosiedade sivíl sira halo, hodi lori ajenda importante ida-ne'e ba oin, Sira-nia lideransa no dedikasaun bot mak importante tebes atu asegura katak progresu ne'ebé ita halo ona hodi prevene no responde ba violénsia bazeia ba jéneru sei kontinua la'o ba oin”, haktuir Ofisial Enkaregadu Koordenador Rezidente Nasoins Unidas.

 Koordenador Rezidente Nasoins Unidas afirma, Projetu Hamutuk ba Igualdade hetan finansiamentu jenerozu husi Governu Korea liuhusi KOICA, parseiru dezenvolvimentu Timor-Leste nian ba tempu naruk. Fundus ida ne'e importante tebes atu apoia implementasaun asaun governu nian ba hapara violénsia hasoru feto no labarik-feto sira, hodi fó kbiit ba sira atu moris livre husi asaltu seksuál no violénsia iha fatin públiku no privadu sira.

 Diretora Nasional KOICA iha Timor-Leste Youhnwa Kang, akresenta tan katak, husi parte KOICA fó ondra ba parte hotu atu servisu ho papel ne’ebé iha hodi prevene VBJ nune’e bele fó kibiit ba feto sira atu bele hola parte iha atividade hotu no direitu ba rai.

 "KOICA sente onra atu hala'o papél importante ida hodi kria enkuadramentu komprehensivu ida atu prevene no responde ba VBJ, marka istoria ida-ne'ebé signifikante hodi fó kbiit ba feto no labarik-feto sira iha Timor-Leste. Hamutuk ba Igualdade halibur mutuk péritu no esforsu husi instituisaun governu Timor-Leste nian, ajénsia ONU haat, KOICA, no OSS sira, hamutuk ho partisipasaun husi ajénsia dezenvolvimentu sira. Liuhusi hasa’e forsa koletiva, inisiativa ne'e hatan ba violénsia doméstika, asediu seksuál, violénsia iha espasu públiku, no VBJ iha kontestu redusaun risku dezastre”, Tenik Diretora Nasional KOICA iha Timor-Leste.

 Entretantu, iha eventu ne'e sei partisipa husi reprezentante prinsipál sira husi benefisiáriu programa nian, KOICA, Sekretariu Estadu ba Igualdade (SEI), liña ministériu sira ba Planu Asaun Nasional kona-ba Violensia Bazeia ba Jeneru (PAN VBJ), autoridade lokál sira husi Dili, Baucau, Covalima, no Oecusse-Ambeno, OSS no parseiru dezenvolvimentu sira. Dezde lansamentu iha Novembru 2020, projetu T4E ne'ebé finansia husi KOICA ne’e, fó ona apoiu ba esforsu governu nian atu prevene no responde ba VBJ, hodi aliña ho PAN VBJne'ebé lidera husi SEI no Mapa ba Objetivu Dezenvolvimentu Sustentavel Nasional.

 Jornalista : Anselmo Martins

Editor : Média RKDTL