Governu Timor-Leste, ne’ebé reprezenta hosi Ministru Administrasaun Estatál, Tomás do Rosário Cabral, no Rejiaun Administrativa Espesiál Makau (RAEM) nian, ne’ebé reprezenta hosi Xefe Ezekutivu, Ho Iat Seng, asina Memorandu Entendimentu ida ne’ebé formaliza jeminasaun entre sidade Dili no Makau. Serimónia asinatura nian hala'o iha Sede Governu RAEM nian, iha loron 26 fulan-setembru tinan 2024.
Akordu ida-ne’e reforsa kooperasaun entre Timor-Leste no Makau, foka ba área ekonomia, komérsiu, turizmu, edukasaun no kultura. Ministru Tomás do Rosário Cabral destaka importánsia hosi akordu ida-ne’e, hodi afirma katak “Makau ho Dili estabelese relasaun jeminasaun ida, no hein katak parseria ida-ne’e entre sidade rua ne’e, sira-nia empreza no sira-nia komunidade sira sei tahan ba tempu naruk ba bein-komún, relasaun ida maduru no konsolidadu, maibé ho buat barak liután atu oferese ba sira ne'ebé hetan benefísiu.”
Xefe Ezekutivu Makau nian, Ho Iat Seng, hatete katak “Timor-Leste no Makau hanesan pontu importante rua iha Rota Marítima Seda nian” no destaka katak jeminasaun ne’e sei permite parte rua atu aproveita oportunidade dezenvolvimentu ne’ebé lori husi inisiativa “Faixa Ida, Rota ida”, ho aprofundamentu kooperasaun ho benefísiu mútuu no konstrusaun konjunta ba futuru ida ne’ebé di’ak-liu.
Durante nia diskursu, Ministru Tomás do Rosário Cabral destaka katak jeminasaun ida-ne’e “nu’udar inu ida ne’ebé loos ba dame no kontribuisaun folin-boot ida ba defeza valór Ázia sira nian, liuliu ita-nia valór istóriku no kulturál sira husi pasadu, prezente no futuru”. Ministru mensiona mós katak, maski iha inserteza no konflitu sira ne’ebé persiste iha rejiaun oioin iha mundu, jeminasaun entre Dili no Makau hanesan prova katak kooperasaun no uniaun entre sidade no nasaun sira bele lori benefísiu signifikativu ba parte rua.
Ministru destaka mós relevánsia joven sira-nian ba futuru parseria ida-ne’e nian, hodi afirma katak “futuru mak joven sira, no presizamente iha kontestu ida-ne’e maka parte rua dezenvolve tan parseria sira, ne’ebé dirije ba setór edukasaun, kultura no juventude”.
Xefe Ezekutivu Makau nian rekorda istória kooperasaun nian entre Makau ho Timor-Leste, temi katak, dezde estabelesimentu relasaun diplomátiku sira entre Xina ho Timor-Leste iha tinan 22 liubá, lasu sira entre nasaun rua ne'e dezenvolve ona ho estavel. Ho Iat Seng destaka katak Makau sei hala’o nafatin ninia knaar hanesan “Plataforma Servisu ba Kooperasaun Komersiál entre Xina no País Lian Portugés sira”, hodi hametin kolaborasaun ho Timor-Leste liuhosi Forum Makau.
Molok hala’o serimónia asinatura, Ministru Tomás do Rosário Cabral no Xefe Ezekutivu Makau nian hasoru malu hodi ko’alia kona-ba tema sira ne’ebé relasiona ho ekonomia, komérsiu, turizmu, edukasaun no kultura, ho hanoin atu hametin liután relasaun entre Dili no Makau.
Iha serimónia ne’e hetan mós partisipasaun husi Diretora Nasionál ba Simplifikasaun no Modernizasaun Administrasaun Lokál, Maria Goretti Marques Belo, Diretór-Jerál Desentralizasaun no Podér Lokál, António Augusto Guterres, Prezidente Autoridade Munisípiu Dili, Gregório da Cunha Saldanha no Komisáriu Ministériu Negósius Estranjeirus Repúblika Populár Xina nian iha RAEM, Liu Xianfa.
0 Comments