Ministru Negósius Estranjeirus no Kooperasaun, Bendito dos Santos Freitas, iha loron 22 fulan-setembru tinan 2024, partisipa iha sorumutu altu nivel nian ida durante Asembleia Jerál Nasoins Unidas ba dala 79, ne'ebé foka ba polítika globál sira hodi kombate mudansa klimátika. Eventu ne'ebé selebra ho almosu traballu ne’e, ko-organiza hosi Xanselér Alemaña, Olaf Scholz, no Primeiru-Ministra Samoa nian, Fiame Naomi Mata'afa, no halibur lider mundiál oioin hodi diskute estratéjia klimátiku nian no hametin kooperasaun internasionál.
Iha nia intervensaun, Ministru Bendito dos Santos Freitas ko’alia-liu kona-ba vulnerabilidade Timor-Leste nian, estadu illa ki’ik ida, hasoru alterasaun klimátika no destaka nesesidade urjente polítika klimátika internasionál nian ne’ebé metin no mekanizmu governasaun globál ne’ebé efikás. “Mudansa klimátika hamosu ameasa ezistensiál ida ba ita-nia ambiente, ekonomia no komunidade. Ami defende polítika klimátika ne'ebé inkluzivu no ekuitativu hodi garante katak nasaun vulneravel sira-nia lian bele rona iha diskusaun globál sira”, dehan Ministru.
Timor-Leste, nu’udar signatáriu ba Akordu Paris, reafirma ninia kompromisu atu hamenus impaktu klimátiku sira iha tempu hanesan atu promove kreximentu ekonómiku ne’ebé sustentável. Governante ne’e subliña importánsia atu integra fonte enerjia renovável sira no adota medida sira reziliénsia nian iha planu dezenvolvimentu nasionál, tuir Objetivu Dezenvolvimentu Sustentável (ODS).
Ministru Negósius Estranjeirus mós husu atu “hametin kooperasaun internasionál no mekanizmu finansiamentu sira hodi apoia inisiativa klimátika iha nasaun sira ne’ebé iha hela dezenvolvimentu”, hodi subliña nesesidade atu “fasilita transferénsia teknolojia no dezenvolvimentu kapasidade hodi hakbiit komunidade lokál sira iha sira-nia esforsu atu adapta no buras hasoru dezafiu klimátiku sira”.
Atu termina, Bendito dos Santos Freitas reafirma vontade Timor-Leste nian atu “kolabora ho nasaun sira seluk hodi kria polítika klimátika inovadora, inkluziva no efikás hodi hatán ba dezafiu imediatu no tempu-naruk”, ho subliña katak “ita-nia futuru depende ba asaun koletiva no responsabilidade hamutuk atu salvaguarda ita-nia planeta ba jerasaun sira iha futuru”.
0 Comments