LICYPRIYA, IDADE 13 SAI LIAN FORTE IHA MOVIMENTU KLIMÁTIKU GLOBÁL

 

Dili-18/09/2024-Média Defisiensia, Prezidente Republika Demokratika Timor-Leste, simu Licypriya Kangujam ho idade 13 sai ativista movimentu klimátiku mai Timor-Leste, no nia sei  partisipa iha série sesaun interativu no aprezentasaun sira iha instituisaun edukasionál oioin.

 Prezidente Republika no Laureadu Nobel da Pás, José Ramos-Horta hatete, ohin simu ativista klimátika Licypriya, hodi kolia kona-ba nia vizita mai TL, ho nia kompromisu ba sustentabilidade ambientál no empoderamentu ba foin-sa'e sira.

 “Simu ho laran kmanek vizita joven ativista klimatika koñesidu Licypriya Kangujam mai Timor-Leste. Vizita ida-ne'e, planeadu husi loron 16 to'o 23 fulan-Setembru tinan 2024, Licypriya hatete nasaun nia kompromisu ba sustentabilidade ambientál no empoderamentu ba foin-sa'e sira. Nia ho de'it tinan 13, sai ona nu’udar lian ne'ebé forte iha movimentu klimátiku globál. Husi tinan neen, nia halo advokasia maka'as ba asaun klimátika, ko'alia iha fórum internasionál sira, no inspira foin-sa'e sira iha mundu tomak atu envolve iha ativizmu ambientál”, Dehan PR liuhusi Komunikadu Imprensa, 18/09/2024.

 

Xefe estadu afirma tan, haksolok ho presensa Licypriya mai TL, hodi fahe nia esperesia no motiva joven sira kona-ba oinsá rezolve krize klimátika globál no harii futuru ne’ebé sustentável.

 

"Ami haksolok tebes atu simu Licypriya Kangujam mai Timor-Leste. Ninia dedikasaun ba advokasia klimátika ho idade ne'ebé ki'ik hanesan ne'e inspira duni. Ami hein katak ninia vizita sei motiva ita-nia foin-sa'e sira atu sai partisipante ativu, hodi rezolve krize klimátika globál no harii futuru ne’ebé sustentável. Hamutuk, ita bele serbisu ba Timor-Leste ida ne’ebé moos, matak liu, no sustentável liu”, Tenik PR.

 

Durante ninia vizita, Kangujam sei partisipa iha série sesaun interativu no aprezentasaun sira iha instituisaun edukasionál oioin iha Timor-Leste laran tomak, inklui CAFE Taibessi, CAFE Bécora, Universidade Católica Timorense, Instituto Professional de Canossa, Eskola Portuguesa de Dili, Universidade Nacional de Timor Lorosae. Eventu sira-ne'e, ho objetivu atu hasa'e konsiénsia kona-ba mudansa klimátika no inspira sidadaun joven sira atu foti asaun ba futuru ida ne'ebé sustentável.

 

Entretantu, Kangujam ho jestu di'ak tebes no sei fahe materiál edukativu no ekipamentu desportu ba eskola lokál sira, inklui laptop 5, no projetór 5 ba hadi'a klase intelijente, pasta eskola ho kualidade aas hamutuk 50, bola futeból 100, sapatu futeból par 20, no 20 salva ain-tur, no 120 pakote estasionáriu eskola nian.

 

Jornalista : Anjelmo Martins

Editor : Média RKDTL