Dili-04/08/2024-
Média Defisiensia, Prezidente José Ramos-Horta kondekora ofisiál
Polísia Nasoins Unidas (UNPOL) na’in sanulu-resin-lima hosi Austrália no Reinu
Unidu ho Medalla Solidariedade Timor-Leste ne'ebé prestijiozu no sertifikadu
rekoñesimentu. Ofisial sira ne’e servi durante Misaun Nasoins Unidas iha Timor
Lorosa’e (UNAMET) ba Konsulta Popular 1999 nian.
Prémiu ida-ne’e fó
onra ba dedikasaun no serbisu krusiál hosi ofisiál sira UNPOL nian durante
períodu referendu istóriku iha 30 Agostu 1999. Sira-nia esforsu sai
instrumentál hodi promove pás no seguransa durante tempu importante ida iha
Timor-Leste nia viajen ba independénsia no demokrasia.
Prezidente
Ramos-Horta afirma, "Medalla Solidariedade Timor-Leste nian simboliza
ita-nia agradesimentu ne'ebé kle'an ba sira ne'ebé, husi fatin oioin iha mundu,
hala'o papél ativu no krusiál iha dezenvolvimentu ita-nia demokrasia. Ofisiál
aten-barani sira-ne'e hamutuk ho ita durante períodu ida ne'ebé dezafiante liu
iha ita-nia istória. Sira nia dedikasaun no servisu iha períodu antes no hafoin
referendu istóriku merese hatudu no rekoñese ba sira nia kontribuisaun ba pás
no seguransa."
Ofisiál
UNPOL na’in hitu husi na’in sanulu-resin-lima, mai husi Australia agora daudaun
iha Timor-Leste simu prémiu diretamente husi Prezidente Ramos-Horta, iha
serimónia ne’ebé hala’o iha Palásiu Prezidensiál Nicolau Lobato.
Enkuantu Ofisiál UNPOL na’in hitu husi Australia ne’ebé simu
kondekorasaun mak hanesan David Savage,
Shaun Bennets, Greg Corin, Martin Hess, Brendon Withers, Sandra Hoffshchildt, Philip Caine.
Rekoñesimentu ida
ne’e subliña Timor-Leste nia kompromisu hodi fó onra ba sira ne’ebé kontribui
ba nia independénsia no dezenvolvimentu demokrátiku. Medalla Solidariedade
Timor-Leste nian sai nu’udar símbolu duradouru ba apoiu komunidade
internasionál nian durante nasaun nia luta ba autodeterminasaun.
Jornalista : Anselmo Martins
Editór : Média RKDTL
0 Comments