Dili-29/08/2024- Média Defisiensia,Prezidente no Laureadu Nobel da Pás, José Ramos-Horta, ho laran-ksolok simu vizita ofisiál dahuluk husi Vise-Primeiru Ministru no Ministru Dezenvolvimentu Rurál no Rejionál Malázia nian, Dato’ Seri Dr. Ahmad Zahid Hamidi, mai Palásiu Prezidensiál Nicolau Lobato. Ida-ne'e marka vizita ofisiál dahuluk husi Vise-Primeiru-Ministru Malázia nian mai Timor-Leste, signifika kapítulu foun ida iha relasaun bilaterál ne'ebé metin entre nasaun rua ne'e.
Timor-Leste no
Malázia dezenvolve relasaun forte dezde Timor-Leste nia independénsia iha 2002,
harii iha baze respeitu no apoiu ba malu. Malázia sai ona nu’udar instrumentál
iha viajen Timor-Leste nian ba estabilidade, kontribui forsa manutensaun pás
nian durante períodu krítiku sira no fornese asisténsia esensiál durante
pandemia COVID-19. Relasaun ne’e hametin liután ho vizita ofisiál husi Primeiru-Ministru
iha tempu ne’ebá, Dr. Mahathir bin Mohamad, iha tinan 2003, ne’ebé sai nu’udar
xefe governu dahuluk ne’ebé vizita Timor-Leste ne’ebé foin ukun-an.
Durante sira-nia
sorumutuk, Prezidente Ramos-Horta no Vise-Primeiru-Ministru Hamidi ko’alia kona-ba
área oioin ne’ebé iha interese mútuu no kooperasaun, inklui parseria ekonómika
no oportunidade komérsiu, haburas kolaborasaun edukasionál sira, no hasa’e
kooperasaun iha setór sira hanesan infraestrutura, turizmu, no kapasitasaun.
Prezidente
Ramos-Horta subliña importánsia relasaun Timor-Leste nian ho Malázia, hodi
afirma, "Ami sente onradu simu Vise-Primeiru-Ministru Hamidi ho nia
delegasaun. Vizita ida-ne'e marka etapa signifikativu ida iha relasaun entre
Timor-Leste no Malázia, no ami haree ba oin hodi harii ita-nia interese no
valór sira ne’ebé ita partilla ba malu."
Líder rua ne'e
espresa sira nia kompromisu atu hametin relasaun bilaterál sira no esplora
dalan foun sira ba kolaborasaun ne'ebé sei fó benefísiu ba povu hosi nasaun rua
ne'e nian.
Vizita husi
Vise-Primeiru-Ministru no Ministru Dezenvolvimentu Rurál no Rejionál Malázia
nian mai Timor-Leste mós inklui partisipa iha eventu prinsipál oioin, hanesan
sai sasin ba troka Memorandu Entendimentu entre instituisaun ensinu sira nasaun
rua nian, ofisializa Meza Redonda Halal "Halo Halal sai Fonte Foun ba
Kresimentu Ekonómiku Timor-Leste nian", no partisipa iha Timor-Leste nia
Aniversáriu Referendu ba dala 25 (Loron Konsulta Populár).
Vizita ofisiál
ida-ne’e subliña importánsia kresimentu Timor-Leste nian iha rejiaun no destaka
esforsu nasaun nian atu hametin ninia relasaun diplomátika no ekonómika ho
nasaun viziñu sira. Ida-ne'e hatudu mos Malázia nia apoiu ne'ebé kontinua ba
Timor-Leste nia aspirasaun atu sai membru kompletu ASEAN nian. Vizita ne’e harii
iha interkámbiu nivel aas resente entre nasaun rua ne’e no ho objetivu atu
estabelese mekanizmu bilaterál ida hodi haree filafali no esplora área sira
kooperasaun nian ne’ebé fó benefísiu ba malu, hodi aprofunda liután amizade no
kolaborasaun ba tempu naruk entre Malázia no Timor-Leste.
Jornalista :
Anselmo Martins
Editor : Média RKDTL
0 Comments