Dili-28/08/2024-
Média Defisiensia,
Prezidente no Laureadu Nobel ba Pás Jose Ramos-Horta ho laran-haksolok simu Sekretáriu
Jerál Nasoins Unidas António Guterres mai Timor-Leste husi loron 28 to’o 31
Agostu 2024, iha komemorasaun Aniversáriu Konsulta Populár ba dala 25. Vizita
istóriku ida-ne'e hatudu parseria ne'ebé metin no naruk entre Timor-Leste no
Nasoins Unidas.
Nu’udar
rekoñesimentu ba Sekretáriu-Jerál Guterres nia papel sentrál durante nia
mandatu nu’udar Primeiru-Ministru Portugál nian, Prezidente Ramos-Horta
kondekora onra aas liu nasaun nian, Grande-Colar Orden Timor-Leste
Durante
sira nia enkontru, Prezidente Ramos-Horta no Sekretáriu-Jerál Guterres envolve
iha diskusaun kona-ba asuntu global oioin, inklui pás no seguransa, ho foku ba
funu sira ne'ebé la’o daudaun iha Myanmar, Gaza, Ukránia no mós krize seguransa
no umanitária ne'ebé la'o hela iha Sudaun. Prezidente Ramos-Horta no
Sekretáriu-Jerál Guterres konkorda katak Konsellu Seguransa ida ne'ebé
reformadu ho reprezentasaun internasionál ne'ebé boot liu no foti desizaun
ne'ebé efetivu liu sei sai krítiku hodi responde ba dezafiu sira iha dame no
seguransa globál ohin loron nian.
Prezidente
Ramos-Horta afirma, "Sekretáriu-Jerál Guterres nia vizita reafirma apoiu
ne'ebé Nasoins Unidas fó ba Timor-Leste durante ita-nia viajen tomak ba
independénsia no liután. Enkuantu ita hasoru dezafiu globál sira, ita-nia
parseria ho ONU sai nafatin
krusiál
ba ita atu hetan dame, dezenvolvimentu, no justisa la'ós de'it ba ita-nia
nasaun maibé ba mundu tomak."
Líder
rua ne'e subliña importánsia hosi multilateralizmu no kooperasaun internasionál
hodi rezolve krize sira ne'ebé kompleksu no interligadu ne'ebé mundu ohin loron
hasoru no garante estabilidade globál. Enkuantu Timor-Leste prepara ba ninia
adezaun ba ASEAN iha tinan 2025, Prezidente subliña kompromisu nasaun nian hodi
hametin liután ninia kooperasaun ho Nasoins Unidas hodi hasoru dezafiu rejionál
no globál sira, partikularmente liuhosi aprosimasaun kolaborativu ba seguransa
no dezenvolvimentu sustentável.
Vizita
ne’e reafirma ligasaun metin entre Timor-Leste ho Nasoens Unidas. Líder rua
ne'e espresa sira nia kompromisu hamutuk atu kontinua parseria ida-ne'e no subliña
Simeira Futuru nian ne'ebé sei mai iha Setembru 2024 nu'udar oportunidade
krítika ida atu reafirma komunidade internasionál nia dedikasaun ba dame,
dezenvolvimentu, no justisa globál.
Jornalista : Anselmo
Editor : Média RKDTL
0 Comments