Tuir Portavoz Cárceres
Nunes Arca hatete, Membru Servisu Nasional Intelijénsia tiru joven na’in ida no
baku joven na’in rua, ida ho kondisaun defisiensia matan hetan kondisaun grave
no liman tohar ho aktu brutalismu ne’e Asosiasaun AHDMTL lameta tebes.
“Membru servisu Nasionál
Intelijénsia (SNI) tiru joven ida husi kotuk to’o borus iha kalilin ,no baku tan joven na’in –
rua,inklui ami nia maluk defisiénsia matan ida iha suku Beiseuk, Postu Tilomar,
Município Covalima.Tuir relatóriu husi fatin akontesimentu, SNI baku ami nia
maluk defisiensia matan to’o liman tohar ho kondisaun grave iha parte liman lo’os .Tanba ne’e ami husi, Asosiasaun Halibur
Defisiensia Matan Timor-Leste, liuhusi komunikadu empresa ne’e hato’o,
ami nia lamentasaun no kondena tebes aktu brutalizmu hirak ne’e, viola
prinsipiu sira liuliu violasaun ba direitus humanus espesial viola direitu ema
ho defisiensia nian”, Dehan Portavoz Carceres iha AHDMTL Manleuana, 06/05.
Portavoz hatutan
Asosiasaun Defisiensia Matan husu Komandu Jeral PNTL, Diresaun Servisu
Intelijénsia, atu responsabiliza ba aktu ne’ebé membru SNI komete no husu Provedoria
Direitos Humanus no Justisa atu akompaña vitima iha prosesu Investigasaun
hamutuk ho Ministériu Defesa no Seguransa atu kopera hamutuk hodi haree prosesu
ne’.
“Ami ejizi ba Komandu
Jeral PNTL, Diresaun Servisu Nasionál Intelijénsia atu toma responsabilidade ba
aktu ne’ebé komete husi membru SNI no
prosesa ho transparente no rigór tuir regulamentu hotu mak vigora iha estadu ida ne’e, se justu
liu demiti husi nia kargu no Provedoria Direitos Humanus e Justiça, atu tulun
vitima sira, hodi prosesa no akompaña prosesu
investigasaun sira atu bele la’o ho transparente to’o hetan justisa ho
loloos no ami husu Ministériu Defesa no Seguransa hamutuk ho PNTL no F-FDTL
kopera ho PDHJ atu intrega material sira kona-ba direitos humanos, liuliu
direitu ema ho defisiénsia nian, iha formasaun akademika PNTL no F-FDTL nian, iha futuru asaun sa de’it mak membru seguransa sira hala’o iha tereinu
bele respeita povu kbi’it laek nia direitu nomos ema ho defisiénsia”, Tenik
Portavoz AHDMTL.
Rekomenda ba sosiedade
hotu, atu respeita maluk defisiente sira nia direitu iha asaun prátiku
hotu-hotu, nune’e maluk defisiensia sira mós bele goza direitu ho liberdade iha
ambiente estadu direitu demokrátiku hodi garante paz no estabilidade iha
Timor-Leste.
Jornalista:
Anjelmo & Geraldino
Editor
: Media RKDTK
0 Comments