ESTUDANTE FINALISTA ESTICA REMATA ONA EZAME NASIONAL

 

Dili-17/10/2023- Media Defisiensia, Estudante Finalista husi Eskola Sekundaria Teknika Informátika Ahisaun (ESTICA) St. Antonio Metinaro remata ona Ezame Nasional husi Departamento Linguagem de Programação hahu iha loron Segunda no remata iha loron Tersa Feira.

Diretor Ezekutivu ESTICA David Marcal

Tuir Diretor Ezekutivu Eskola Sekundaria Teknika Informatika Ahisaun St. Antonio Metinaro David Marcal iha Intervista ba Media RKDTL hatete, Ezame Nasional Laos foin mak realiza ba dala ida, maibe realiza ba dala haat ona, hodi hasae konesementu Estudante Finalista sira nian iha Area Informatika.

"Ezame Nasional ida ne'e hahu ba dala IV ona ho objetivu Atu hametin no promove Siensia Teknolojia iha Area Informatika, hodi promove ema ho Defisiensia sira nia kapasidade liu husi Manorin nain hodi hasa'e konesementu Estudante sira nian iha Eskola refere” Dehan Diretor David Marcal iha salaun Eskritoriu Metinaro.

Nia hatutan tan katak Ezame Nasional ida ne’e ba loron daruak ho numeru Estudante hamutuk nain 10 feto 5 no mane 5 no Eskola refere iha Departamentu ida maka Teknika Linguagem de Programação kompostu husi Materia 4 mak hanesan Matematika, Lingua Ingles, Lingua Portugues no Fisika.

Professor Vijilante Anacleto Soares

Iha Sorin Seluk Professor Vijilante husi Eskola Sekundariu Geral 20 de Setembro Metinaro Anacleto Soares iha nia Parte hatete Estudante sira husi ESTV ESTICA St. Antonio realiza Ezame Nasional durante loron rua ne'e lao diak tebe-tebes tanba laiha Barullu.

"Tuir vijilante ninia hare durante Ezame Nasional hori sehik no ohin iha ESTV ESTICA St. Antonio Metinaro ne'e la'o diak tebe-tebes, tanba Estudante sira tama sala hakmatek no oras to'o sira tuir Ezame no sira la iha barullu to'o oras Remata” Tenik Professor Anacleto.

Reprezentante Estudante Finalista  ESTICA Candido A. Guterres

Reprezentante Estudante Finalista husi ESTV ESTICA Candido A. Guterres ho kondisaun Defisiensia fisiku Sente kontente tebes tanba bele realiza ona Ezame Nasional ne’e ho di’ak.

"Hau senti kontente tebes, maski hau ho kondisaun Defisiensia maibe ida ne'e lahamate hau nia vontande ikus mai hau bele termina ona hau nia Ezame Nasional iha tinan ida ne'e durante loron rua la’o ho diak” dehan Candido Reprezentante Estudante Finalista.

Entretantu Estudante sira nebe termina ona sira nia estudu iha tinan 2020-2022 hamutuk 48 no Estudante Finalista iha tinan 2023 hamutuk 10.

Jornalista: Ermenciana Alves

Editor: Media RKDTL