SEI HAMUTUK HO EMBAIXADA AUSTRALIA ORGANIZA DISKUSAUN BA TRABALLADÓR DOMÉSTIKU IHA TIMOR-LESTE

 

Foto: Pascoal Nascimento de Jesus (Jornalista RKDTL)

Dili-11/09/2023-Media Defisiensia, Embaixadóra Australia ba igualidade jéneru hamutuk ho Sekretária Estadu ba igualidade jéneru Timor-Leste realiza diskusaun panel kona-ba reformasaun traballadór doméstika ba feto iha Timor-Leste.

Iha Intervista ba Jornalista sira Sekretaria Estadu de Igualidade Timor-Leste Sra. Elvina Sousa Carvalho hatete, Objetivu realiza diskusaun ida ne’e tamba traballadór doméstiku sira daudaun ne’e la proteje ho lei kodigu traballadór Timor-Leste nian, nune’e importansia atu halo diskusaun hodi bele iha lei juridika ba traballadór sira.

Sekretaria Estadu de Igualidade Timor-Leste Sra. Elvina Sousa Carvalho

“Diskusaun ne’e importante atu lori ita hotu ne’ebé maka preokupa ba situasaun ka problema husi traballadór doméstika sira, tamba traballadór sira barak maka hetan deskriminasaun makas no servisu ne’ebé sira halo hetan saláriu la balansu.” Dehan Sekretaria iha Suai Room Plaza

Sekretaria Estadu de Igualidade Timor-Leste ne’e hatutan, Orgullu hodi hato’o ba públiku tamba tempu to’o ona hodi halo lei ba traballadór sira.  Proposta lei ba traballadór doméstiku sira hatama ona husi governu anteriór ba iha parlamentu nasionál, maibé iha lesjislatura foun entaun presiza evaluasaun no aprezenta fila-fali ba Governu atu hetan aprova.

Iha fatin hanesan Embaixadora ba Igualdade Jéneru Australia Stephanie Copus Campbell hatete, kontente no agradese tebes bele hola parte iha diskusaun ida ne’e hodi hatene mós opiniaun husi ema seluk hodi fo advokasia no kooperasaun regular ne’ebe sei proteje traballadór doméstika sira ne’ebé maioria feto de’it.

Embaixadora ba Igualdade Jéneru Australia Stephanie Copus Campbell

“sorumutu ba diskusaun refere sai pontu importante hodi halo protesaun ba traballadór doméstiku sira fó komitmentu atu fasilita diálogu kona-bá polítika igualidade jéneru ho governu no parseiru sosiedade sivíl sira”. Dehan Embaixadora Igualdade Jeneru Australia Stephanie Copus Campbell

Iha sorin seluk Embaixadora Australia Chargé d’Affaires Caitlin Wilson hatete, atividade ida ne’e realiza tamba importante tebes hodi hatene opiniaun ita hotu nian ba traballadór/a sira iha sosiedade ka komunidade ne’ebé kontribui ba progresu iha nasaun sira.

Embaixadora Australia Chargé d’Affaires Caitlin Wilson

“Orgullu tebes hodi organiza atividade ida ne’e hodi hatudu apoiu husi Embaixada Australia ba Governu Timor-Leste liu-liu hare ba importansia sira traballador domestika nian”. Tenik Embaixadora Australia iha sala diskusaun Suai Room Timor Plaza Dili Timor-Leste.

Traballadór doméstiku 2.3% husi empregu globalmente (1 husi kada traballadór na’in 25). Iha Ázia pasífiku maka empregadór boot liu iha traballadór doméstiku- rejiaun ida ne’e hanesan fatin ba traballadór millaun 38, metade husi traballadór doméstiku mundu tomak. Importante liu, traballadór feto hamutuk 80.5% iha setór ne’e besik 62% maka inklui husi lei traballadór nian, no 94% laiha limitasaun legál ba oras no loron servisu nian.

Entretantu diskusaun refere husi panel sira hanesan SEFOPE, Embaixadora Australia ba Igualidade Jéneru, Sra. Sephanie Copus Campbell, Sekretaria Estadu ba Igualidade Sra. Elvina Sousa Carvalho, Sekretáriu Estadu ba Dezenvolvimentu Kapasidade Profisionál no Empregu Sr. Rogério Araújo Mendonca, Sra. Ricar Pacoela, Diretór Working Women’s Centre Timor-Leste, Sr. Almerio Vilanova Prezidente Konfederasaun Sindikatu Timor-Leste, nomos Sra. Rita Fernandes, Reprezentativu Organizasaun Traballadór Internasionál. Atividade ne’e partisipasaun maximu husi agensia internasional, Rede Feto, PNTL, no mós Organizasaun sosiedade sivil sira hotu iha Timor-Leste.  

Jornalista: Ermenciana Alves no Efifania dos Santos 

Editor: Alexandre Salsinha