ATLETA KLASIFIKASAUN SEI IHA OPORTUNIDADE BA KOMPETE IHA NASAUN HANGZHOU CHINA

Dili-13/09/2023-Media Defisiénsia, Fiderasaun Atletismu Defisiensia Timor-Leste, nafatin fo treniu  ba atleta klasifikasaun nain haat (4) ne’ebé sei ba kompete iha Nasaun HangZhou China  iha tinan 2023.   

Iha Intervista ba Media RKDTL Sekretariu Geral federasaun atletismo Defisiensia Timor-Leste Domingos Urbano hatete, husi federasaun atletismu prepara  ona hodi ba kompete iha Hangzhou China  bazeia ba despaixu komisaun organizadora ne’ebé hala’o ona enkontru ho Komite Paralimpico Nasional  Timor-Leste.

Intervista: Efifania dos Santos

“Atleta ne’ebé atu ba kompete iha Hangzhou China ba tinan ida ne’e laiha seleksaun maibé hare ba atleta ne’ebé hetan klasifikasaun no simu ona medallia   iha Nasaun Cambodia ho solo, hodi fasilita treinamentu di’ak liután ba sira nune’e bele submete sira nia naran ba iha CPNTL hodi hein ba kompete iha tinan ida ne’e”. dehan Domingos Urvano iha kampu Estadium Dili.

Sekretariu Geral ne’e hatutan, federasaun hakarak atleta sira sai kualidade liután hodi ba kompete, maibé dezafiu iha orsamentu la maximu hodi bele suporta atleta sira tamba kompetisaun ne’ebé agora sira prepara sai eventu bo’ot hodi hakat pasu ida ba Olimpic.

Iha fatin hanesan Treinadora Fiderasaun Atletismu Defisiensia Timor-Leste Cesaltina da Silva hatete, nafatin fasilita treinamentu ba Atleta sira maske sira la’os atleta foun maibé nafatin korajem no motiva sira nune’e bele kompete ho di’ak liután hodi lori Nasaun Timor-Leste ba oin.

“Ami prepara durante fulan tolu nia laran antes ida ne’e ami trenu ona wainhira tama iha planu Secretariu Estadu CCD nian, sira mós presiza hetan fatin diak no hetan alimentasaun, ami trenu loro-loron husi dader no loraik depois ami halo programa dader tuku lima no loraik tuku lima iha dader ami halo programa sedu sira bele halai to Cristo-Rei fila fali mai Palasio no iha lokraik sira trenu iha kampu stadium”. Tenik Treinadora Cesaltina.

Treinadora ne’e Salienta, sai treinadora la’os buat ne’ebé fasil maibé ita presiza pasiensia atu komprende uluk antes ita fo treinu tamba diferente ema ho defisiensia no la defisiensia nia kondisaun no karakter la hanesan.

Atleta fiderasaun atletismu Teofilo Freitas hatete, iha nia parte agradese ba Fiderasaun defisiensia Timor-Leste ne’ebé nafatin fó fiar ba nia hodi bele ba kompete iha nasaun Hangzhou China ba tinan ida ne’e.

“konfiansa ne’ebé federasaun fó ami sei iha responsavel hodi ba kompete, maske hanesan defisiensia senti todan maibé ho esperiensia ne’ebé hetan ona la lakon vontade hodi ba kompete nune’e bele hamorin Nasaun Timor-Leste iha Nasaun seluk”. Dehan Atleta Teofilo iha kampu Stadium Dili

Entretantu Kompetisaun refere sei realiza iha fulan Outobru tinan 2023, kompostu husi atleta nain haat (4) mane (3) feto (1) no kompetisaun refere hala’o iha Nasaun Hangzhou China.

Jornalista: Ermenciana Alves, Efifania dos Santos no Saturnina P. Gomes

Editor: Alexandre Salsinha