LIAN TETUN TAMA ONA BA EZAME NASIONAL IHA TINAN NE’E

 

Xefe Departamentu do Ensinu Florentina Fernandes

Dili-25/08/2023, Media Defisiensia - Xefe Departamentu do Ensinu realiza formasaun ho Diretores sira kompostu husi Ensinu Bazíku to’o Ensinu Sekundáriu kona ba ezame final ne’ebé sei mai tanba tinan ne’e sei mosu tan disiplina Lian Tetun ba iha ezame nasional ho razaun tuir lei ne’ebé aprovadu ona iha 20 de Maiu 2020 katak lian Tetun mos tenke sai hanesan Lian Ofisiál.

Iha intervista ba Media RKDTL Xefe Departamentu do Ensinu Florentina Fernandes, informa formasaun ne’e importante tebes ba direstores sira hodi hatene maneira oinsa atu uza iha durante  ezame nasional atu la bele iha failansu.

“Atividade ohin formasaun ne’ebé tenke pasa ba diretores sira Ensinu Sekundaria Geral, Ensinu Sekundaria Tékniku Vokasional, ho Ensinu Bazíku sira para sira bele hatene maneira oinsa mak ezame nasional atu la’o, ne’ebé tinan tinan hanesan abituamente Edukasaun Munispiu Dili inklui 13 Munisipiu ne’e sempre involve an halo formasaun ba diretores sira antes halo ezame nasional para sira bele hatene maneira ho lala’ok ne’ebé ke atu utiliza ba durante ezame nasional par atu nune’e realiza ezame nasional la bele hetan failansu bainhira kuandu ita hala’o ona ezame nasional, tanba ne’e mak agora dadaun formasaun ne’e ba iha Munisipiu Dili durante loron ida tomak. Informa xefe departamentu Florentina Fernandes iha Edukasaun Munisipal Comoro Dili.

Xefe Departamentu ne’e salienta, Difikuldade ne’ebé hasoru mak la iha Manual Lian Tetun atu hanorin, maibé Manorin sira barak liu foti husi internet mak bele hanorin fali ba alunus sira.

“difikuldade mak durante prosesu de aprendisazen manual ba hanorin ne’e la iha ida, maioria professor sira ne’e uza de’it husi internet bele sai hanesan materia ida bele hanorin estudante sira, entaun husi ida ne’e eskola hotu hetan difikuldade tanba buat foun, bai-bain kan lingua Tetun ba iha ezame lokal maibé agora Lian Tetun tenke tama iha ezame nasionál ho razaun ida katak tanba Portugés sai hanesan lingua Ofisiál i tambem Lian Tetun mos sai hanesan lian Ofisiál, entaun rua ne’e tenke tama hotu iha ezame nasionál, se lae Tetun ne’e iha hela de’it ezame lokál hela de’it portugés mak saida, tuir lolos ne’e ita nia nasaun TL ne’e kan utiliza Lian rua sai hanesan lian ofisiál,” hakotu nia.

Enkuantu ba oras ne’e maske Manual Lian Tetun seidauk iha maibé Lian Tetun hetan aprovadu ona husi governu katak Tetun mos tenke sain hanesan Lian Ofisiál iha ita nia nasaun, tanba ne’e tenke transforma fali Tetun ba mos iha ezame nasionál.

Jornalista : Alexandre Salsinha

Editor : Alexandre Salsinha