Dili-19/07/2023-Media Defisiensia, Diretór
Ezekutivu, Centru Nasionál Chega (CNC), Hugo Maria Fernandes, hatete CNC
hakarak husu apoiu Prezidente Repúblika (PR), José Ramos-Horta nian, oinsá atu
apoiu CNC atu halo protesaun ba fatin istóriku sira iha Timor-Leste.
Diretór Ezekutivu, (CNC), Hugo Maria
Fernandes, hato'o deklarasaun ne'e hafoin enkontru ho Prezidente Repúblika
(PR), José Ramos-Horta, kuarta (19/07) ne'e, iha Palásiu Prezidensiál Bairo
Pite Díli.
Hugo Fernandes, informa ohin CNC mai halo
enkontru ho Xefe Estadu hato'o asuntu balun ne'ebé sai atensaun ba CNC nian,
mós husu apoiu husi Xefe Estadu nian, kona-ba protesaun fatin istóriku sira.
"Enkontru ohin hato'o pontu hira
kedan, dahuluk kona-ba oinsá Xefe Estadu nia apoiu ba iha CNC, iha asuntu sira
kona-ba protesaun fatin istóriku sira, daruak kona-ba inisiativa husi Xefe
Estadu kona-ba rekonsiliasaun, ohin Xefe Estadu fó orientasaun rekonsiliasaun
tenke kontinua halo iha rai laran, no mós ita nia maluk sira ne'ebé agora ne'e
sei hela iha Indonézia ne'eba, datoluk ko'alia kona-ba oinsá mak CNC bele
kontinua fahe esperénsia Timor nian, ba rejiaun ida ne'e no mós ba iha
komunidade internasionál", hatete Hugo Fernandes
Nia hatuir katak, "CNC mós husu ba
Xefe Estadu tanba CNC hamutuk ho Ministériu Ensinu Superior Siénsia no Kultura,
governu anteriór submete tiha ona dekretu lei ida kona-ba rejistu, no mós
kategorisaun ba fatin istóriku sira, hein hela Xefe Estadu atu promulga lei ida
ne'e, depois ita alista hotu kedan fatin sira ne'e, no iha enkuadramentu
juridiku ida nia laran", hatuir Hugo
Enkuantu durante tinan ha'at nia laran,
CNC halo ona identifikasaun ba fatin istóriku sira iha munisípiu hotu, no
kapitál Díli CNC konsege rejista fatin istóriku hamutuk 25.
"Iha Dili de'it, husi parte CNC
rejista mais 25 resin fatin istóriku ne'ebé iha uma no parede, balun tau hela
plaka sira nune'e públiku bele hatene, ida ne'e mós ohin ita husu ba Xefe
Estadu, depois dekretu lei ne'ebé haruka tiha mai ne'e, Xefe Estadu bele
promulga iha tempu badak", hatutan Hugo
Hugo Fernandes hatutan katak, durante
enkontru Prezidente Repúblika, José Ramos Horta apresia ho servisu ne'ebé maka
CNC halo durante ne'e.
"Xefe Estadu ejize nafatin ba CNC mak
iha inisitiva ida kona-ba rekonsiliasaun nian, la'ós de'it ba asuntu sira 1999
nian, maibé rekonsiliasaun bo'ot liu hahú kedan husi funu maun alin nian iha
1975 to'o ida ne'e, Xefe Estadu husu depois CNC kontinua apoiu ida ne'e, tanba
Xefe Estadu iha planu rasik, nia hakarak durante nia termu iha Prezidente
Repúblika, kazu sira kona-ba pasadu nian ita tenke halo hotu ne'ebé Xefe Estadu
kontinua husu CNC atu apoiu inistiva ida ne'e", hakotu Hugo.
Jornalista:
Alexandre Salsinha
Editor:
Alexandre Salsinha
0 Comments